Xaçmazın Hacıəhmədoba, Əhmədoba, Şərifoba, Mənçəroba, Hacıqazma və Əzizli kimi kəndləri mavi yanacaqdan məhrumdur. Bu haqda ShimalNews 3 aprel tarixində İctimai TV-yə istinadən məlumat verir.
Sakinlər illərdir qızınmaq üçün ağacları kəsməyə məcbur olurlar. Artıq meşədə ağac qalmayıb. Kəndlilər keçiblər öz həyətlərindəki meyvə ağaclarını kəsməyə.
“Azəriqaz İB-nin öz resursları hesabına qazlaşma prosesi icra olunur. Ona görə də fiziki və eyni zamanda maliyyə məsələləri hər il qazlaşmaya adekvat olmalıdır ki, plana alınmış qazlaşması nəzərdə tutulan kəndlərin qazlaşması reallaşsın”, - deyə Azəriqaz İB-nin şöbə rəisi Eldəniz Vəliyev bildirib.
Mütəxəssislər hesab edirlər ki, hökumət kəndlərin qazlaşdırılmasını prioritetləşdirməlidir. Eyni zamanda digər bir həll yolu alternativ variantlardır. Məsələn, bir çox xarici ölkələrdə izolyasiya vasitəsindən istifadə olunur.
Ekspertlərdən biri deyir ki, yaşayış evlərinin isitmə məsələsini izolyasiya həll edə bilər. Yəni hökumət qaz kompressor stansiyasını qoymağa 15-20 milyon manat xərcləyir. İstilik saxlayan materiallara hər ev üçün 5-10 min manat ayrılsa, bu, isitməyə sərf edilən qazı 3-5 dəfə azalda bilər.
