Xaçmaz rayonunda iki məktəbdə müəllim çatışmazlığı ilə bağlı valideynlər tərəfindən redaksiyamıza müraciət daxil olub.
Shimal.News-a müraciət edən vətəndaşların sözlərinə görə, Xudat şəhər 2 nömrəli tam orta məktəbdə ötən tədris ilindən riyaziyyat müəllimi problemi yaşanır.
Valideynlər bildirirlər ki, əvvəlki riyaziyyat müəllimi səhhəti ilə əlaqədar uzunmüddətli xəstəlik məzuniyyətinə çıxıb. Həmin müddətdə şagirdlərin dərsləri ilə bağlı çətinliklər yarandığı, yay aylarında isə müəllimin işdən ayrıldığı qeyd olunur.
Valideynlərin sözlərinə görə, yeni tədris ili başlamasına baxmayaraq, məktəbdə həmin fənn üzrə müəllim yoxdur və dərslərin keçirilməsi ilə bağlı problem davam edir. Onlar bildirirlər ki, məsələ ilə bağlı ötən il müvafiq qurumlara müraciət etsələr də, nəticə əldə olunmayıb.
Digər müraciət isə Nərəcan kəndində yerləşən Cavid Cəbiyev adına tam orta məktəbin 3A sinfi ilə bağlıdır.
Şagirdlərin valideynləri bildirirlər ki, sinif müəlliminin analıq məzuniyyətinə çıxmasından sonra uşaqlar daimi müəllimsiz qalıblar. Onların sözlərinə görə, sinfə nəzarət olunsa da, tədris proqramı tam həcmdə həyata keçirilmir.
Valideynlərə müəllimin əvəzedicisinin təyin olunmasının yanvar ayına qədər gecikə biləcəyi bildirilib.
Valideynlər ibtidai sinif şagirdlərinin uzun müddət müəllimsiz qalmasının təhsilə mənfi təsir göstərə biləcəyini qeyd edərək, 3A sinfinə əvəzedici müəllim təyin olunmasını və dərslərin fasiləsizliyinin təmin edilməsini istəyirlər.
Məsələ ilə bağlı aidiyyəti təhsil qurumuna sorğu göndərilib.
