Xaçmaz rayonunun Hacıəlibəy kəndində kanalizasiya problemi ilə bağlı rəsmi açıqlama ilə sakinlərin dedikləri üst-üstə düşmür.
Shimal.News xəbər verir ki, bir neçə gün əvvəl "PMK" adlanan həmin ərazidə uzun müddətdir baxımsız və antisanitar vəziyyət yaranması ilə bağlı məlumat vermişdik.
Xəbər yayımlandıqdan iki gün sonra Xaçmaz Rayon İcra Hakimiyyətinin rəsmi sosial şəbəkə hesabından şərh yazılaraq "Məlumat üçün bildiririk ki, aidiyyəti qurum tərəfindən məsələ öz həllini tapmışdır" ifadəsi işlədilib.
Lakin Shimal.News-un əldə etdiyi məlumata görə, problem aidiyyəti qurum tərəfindən deyil, sakinlərin şəxsi vəsaiti hesabına aradan qaldırıldığı iddia olunur.
Vətəndaşların iddiasına əsasən, sakinlər öz aralarında vəsait toplayaraq ümumilikdə 100 manat ödəyiblər və kanalizasiya təmizləyən texnika əraziyə cəlb olunub. Kanalizasiya xətti də məhz bu yolla təmizlənib.
Kənd sakinləri hesab edirlər ki, problemin onların şəxsi vəsaiti ilə həll edilməsinə baxmayaraq, rəsmi qurumun bunu öz fəaliyyəti kimi təqdim etməsi düzgün deyil.
Shimal.News məsələ ilə bağlı Xaçmaz Rayon İcra Hakimiyyətinin və aidiyyəti qurumların mövqeyini də dərc etməyə hazırdır.
