Bu gün şəhid Təbriz Qasımovun doğum günüdür.
Təbriz Ramiz oğlu Qasımov 16 fevral 1993-cü ildə Qəbələ rayonunun Yemişanlı kəndində anadan olub.
1999-2008-ci illərdə Şükran Eyvazov adına Yemişanlı kənd tam orta məktəbində təhsil alıb. Daha sonra təhsilini Şəki Pedaqoji Kollecində "İbtidai sinif müəllimliyi" ixtisası üzrə davam etdirib və 2011-ci ildə kolleci bitirib.
O, 2012-ci ildə Sumqayıt şəhərində yerləşən "N" saylı hərbi hissədə müddətli həqiqi hərbi xidmət keçib. 2013-cü ildə hərbi xidmətdən tərxis olunduqdan sonra həmin hərbi hissədə qalaraq müddətdən artıq həqiqi hərbi xidmət hərbi qulluqçusu kimi fəaliyyətini davam etdirib. 2015-2018-ci illərdə Daxili Qoşunlarda gizir rütbəsində xidmət edib.
Azərbaycan Ordusunun giziri olan Təbriz Qasımov 2020-ci il sentyabrın 27-də başlanan Vətən müharibəsində könüllü olaraq iştirak edib. O, Xocavənd və Füzuli istiqamətlərində gedən döyüşlərdə şücaət göstərib. Təbriz Qasımov 5 noyabr 2020-ci ildə Xocavənd uğrunda gedən döyüşlərdə qəhrəmancasına şəhid olub.
Ölümündən sonra "Vətən uğrunda", "Füzulinin azad olunmasına görə" və "Xocavəndin azad olunmasına görə" medalları ilə təltif edilib.
