Xudat şəhərinin Axundov küçəsində salınan velosiped zolaqları sakinlər və sahibkarlar arasında narazılıq yaradıb. Onların sözlərinə görə, yolun hərəkət hissəsinin daralması və parklanma imkanlarının məhdudlaşması həm sürücülər, həm də ərazidə fəaliyyət göstərən obyektlər üçün çətinliklər yaradıb.
Shimal.News-a danışan sakinlər bildirirlər ki, velosiped zolaqlarının salınmasından sonra avtomobillər üçün nəzərdə tutulan hərəkət hissəsi daralıb. Onların iddiasına görə, küçə boyunca avtomobil saxlamaq demək olar ki, mümkün deyil və parklanma qaydalarının pozulmasına görə sürücülər inzibati məsuliyyətə cəlb olunurlar.
Ərazidə fəaliyyət göstərən mağaza, aptek, kafe və digər obyekt sahibləri isə parklanma yerlərinin olmamasının müştəri axınına mənfi təsir etdiyini deyirlər. Onların sözlərinə görə, avtomobilini saxlaya bilməyən vətəndaşlar alış-veriş etmədən ərazini tərk edir ki, bu da dövriyyənin azalmasına səbəb olur.
Sakinlər və sahibkarlar Axundov küçəsində yaranmış vəziyyətə yenidən baxılmasını, parklanma imkanlarının artırılmasını və hərəkətin daha səmərəli təşkil edilməsini istəyirlər.
