Dövlət Tibbi-Sosial Ekspertiza və Reabilitasiya Agentliyinin təşkilatçılığı ilə Azərbaycana gələn ukraynalı uşaqların reabilitasiya proqramı Qəbələdə davam edir.
Uşaqlar Qəbələ Uşaq Reabilitasiya Mərkəzində tibbi və psixoloji xidmətlər almaqla yanaşı, bölgənin tarixi və turistik məkanları ilə də yaxından tanış olurlar.
Proqram çərçivəsində qonaqlar Qəbələnin ən füsunkar guşələrindən biri olan Laza kəndinə səfər ediblər. Dağ havası, təmiz təbiət, yoqa məşğələləri və müxtəlif əyləncəli proqramlar uşaqlara xoş anlar yaşadıb. Onlar rəqs edib, oyunlar oynayıb, dağ mənzərəsinin gözəlliyindən zövq alıblar.
Ukraynadan gələn uşaqlar Azərbaycanda gördükləri qonaqpərvərlikdən məmnun olduqlarını bildiriblər. Qrup rəhbərlərindən Anna Zaxareviç göstərilən diqqət və qayğını yüksək qiymətləndirərək, uşaqların bu günləri uzun illər unutmayacaqlarını vurğulayıb.
Qeyd edək ki, reabilitasiya proqramı çərçivəsində uşaqlar artıq Şəki rayonunun tarixi-mədəni abidələrini də ziyarət ediblər.
Mütəxəssislərin sözlərinə görə, bu layihə müharibədən zərər görmüş uşaqların psixoloji vəziyyətinin yaxşılaşdırılması, onların sosial adaptasiyası və mənəvi dəstəklənməsi baxımından mühüm əhəmiyyət daşıyır. Program növbəti günlərdə də Azərbaycanın müxtəlif bölgələrinə təşkil olunacaq ekskursiyalarla davam edəcək.
Mənbə: Azərtac
