Son günlər yırtıcı heyvanlar Zaqatala şəhərinin mərkəzində yerləşən Saleh Qocayev küçəsini hədəfə alıblar.
Apa TV-nin məlumatına görə, həyətyanı sahələrdə saxlanılan toyuqlara tülkülərin hücumu kəskin şəkildə artıb.
Son bir neçə gün ərzində təkrar-təkrar hücumlar baş verib, nəticədə onlarla ev quşu tələf olub. Hadisələr əsasən axşam və gecə saatlarında qeydə alınır.
Sakinlər vurğulayırlar ki, vəhşi heyvanlar şəhər mərkəzində görünürlər. Bu ailələrə, xüsusilə uşaqlara ciddi təhlükə mənbəyidir. Bəzi sakinlər təkcə tülkülərin deyil, meşə pişiyinin də şəhər ərazisində görüldüyünü iddia edirlər. Onların fikrincə, bu vəziyyət şəhərə yaxın meşə zolaqlarında qida çatışmazlığı və mövsümi amillərlə bağlı ola bilər.
Məsələ ilə bağlı Ekologiya və Təbii Sərvətlər Nazirliyinə müraciət olunub. Nazirlikdən bildirilib ki, vəhşi heyvanlar yaşayış məntəqələrinə daxil olduqda və ya insanlara, kənd təsərrüfatı heyvanlarına təhlükə yaratdıqda vətəndaşlar 168 çağrı mərkəzinə məlumat verməlidirlər. Rəsmi müraciət daxil olduqda regional ekologiya idarələrinin mütəxəssislərindən və ovçulardan ibarət işçi qruplar yaradılır, təhlükə yaradan heyvanların ərazidən uzaqlaşdırılması üçün müvafiq tədbirlər görülür.
Hazırda Zaqatala sakinləri həm artan maddi zərərdən, həm də təhlükəsizlik məsələsindən ciddi narahatdırlar. Onlar aidiyyəti qurumlardan vəziyyətə operativ müdaxilə olunmasını və yaşayış məntəqələrində təhlükəsizliyin təmin edilməsini tələb edirlər.
