Quba rayonunun Timiryazev qəsəbəsində, 14 saylı körpələr evi-uşaq bağçası və stadionun qarşısından keçən, Quba-Bakı və Quba-Xaçmaz magistrallarını birləşdirən yol bərbad vəziyyətə düşüb.
Shimal.News-a danışan sakinlərin sözlərinə görə, sözügedən yol əvvəllər nisbətən normal vəziyyətdə olub. Lakin bir neçə ay əvvəl yolda aparılan yarımçıq təmir işlərindən sonra vəziyyət daha da pisləşib. Belə ki, yolun üzərinə asfalt qırıntıları tökülsə də, bu, problemi aradan qaldırmayıb. Əksinə, qısa müddət sonra yolda daha dərin çuxurlar əmələ gəlib.
Hazırda yolun vəziyyəti sürücülər üçün ciddi problem yaradır. Bildirilir ki, dərin çalalar səbəbindən avtomobillərin asqı sistemi zədələnir, nəqliyyat vasitələrinin hərəkəti isə xeyli çətinləşib.
