Xudatın Su Kəməri qəsəbəsində 10 aydır davam edən içməli su problemi ilə bağlı Shimal.News-un sorğusuna cavab olaraq Azərsu-dan bildirilib ki, sözügedən ərazi Xaçmaz Su Meliorasiya Sistemlərinin İstismarı İdarəsinin xidmət ərazisinə daxil deyil.
Qurumdan qeyd olunub ki, ərazidə içməli su təminatında yaranmış problem texniki səbəblərlə əlaqədardır.
Bildirilib ki, qəsəbənin dayanıqlı içməli su təminatının yaxşılaşdırılması istiqamətində müvafiq tədbirlərin dövlət investisiya proqramı çərçivəsində həyata keçirilməsi və məsələnin növbəti mərhələlərdə həlli nəzərdə tutulur.
***
Xaçmaz rayonunun Xudat şəhərində yerləşən Su kəməri qəsəbəsi adlanan ərazidə içməli su problemi yaşanır. Şollar su kəmərinin başlanğıc nöqtəsinin yerləşdiyi, 200-dən çox sakinin yaşadığı qəsəbədəki evlərə su verilişinin təxminən 10 aydır dayandırıldığı bildirilib.
Shimal.News-a danışan sakinlərin sözlərinə görə, qəsəbədə artezian quyusu, nasos və su çəni mövcuddur. Lakin yaşayış məntəqəsinə suyun verilməsini təmin edən əməkdaşın ötən il vəfat etməsindən sonra onun yerinə yeni işçi təyin olunmayıb.
Sakinlər bildirirlər ki, mövcud infrastrukturdan istifadə etməklə qəsəbənin su təminatını bərpa etmək mümkündür. Onların sözlərinə görə, məsələ ilə bağlı dəfələrlə aidiyyəti qurumlara müraciət edilib. Lakin indiyədək problemin həlli istiqamətində konkret nəticə əldə olunmayıb.
Sakinlər aidiyyəti qurumlardan qəsəbədə içməli su təminatının bərpa edilməsini və nasosun işlədilməsi üçün məsul şəxsin təyin olunmasını xahiş edirlər.
Məsələ ilə bağlı aidiyyəti quruma sorğu ünvanlanıb.
