Siyəzənlə Şabran arasında sərnişin daşıyan marşrutun fəaliyyət göstərməməsi sakinlərin narazılığına səbəb olub.
Shimal.News-a müraciət edən vətəndaşlar iddia edirlər ki, marşrut artıq 4 gündür Siyəzən avtovağzalından fəaliyyət göstərmir və hər gün bu xəttdən istifadə edən çoxsaylı sərnişin yolda qalır.
Sakinlər bildirirlər ki, əvvəllər Siyəzən avtovağzalından Şabran avtovağzalına təxminən hər 30 dəqiqədən bir marşrut işləyib. Hazırda isə avtobusların avtovağzaldan buraxılmadığı iddia olunur.
Məsələ ilə bağlı rəsmi qurumdan redaksiyamıza bildirilib ki, marşrutun fəaliyyətində heç bir problem yoxdur və avtobuslar işləyir. Sadəcə, avtobuslar Siyəzən avtovağzalından deyil, bazarın qarşısından yola düşürlər.
Lakin sərnişinlər bu açıqlama ilə razılaşmır və əsas problemin məhz Siyəzən avtovağzalından marşrutun buraxılmaması olduğunu bildirirlər.
Sakinlər problemin araşdırılmasını və əvvəlki qaydada sərnişin daşınmasının bərpa olunmasını xahiş edirlər.
