Bu gün şəhidlərimiz - Aşurəli Zərbəliyev, Kənan Ağayev və İzzət Hümmətovun doğum günüdür.
Aşurəli Səfərəli oğlu Zərbəliyev 1999-cu il sentyabrın 9-da Qusar rayonunun Quxuroba kəndində anadan olub. 2005-2014-cü illərdə Qusar rayonunun Quxuroba kənd tam orta məktəbində təhsil alıb.
2017-2019-cu illərdə Azərbaycan Silahlı Qüvvələrinin sıralarında müddətli həqiqi hərbi xidmət keçib.
Azərbaycan Ordusunun əsgəri Aşurəli Zərbəliyev 2020-ci il sentyabrın 27-də başlayan Vətən müharibəsində iştirak edib. Füzulinin azadlığı uğrunda gedən döyüşlərdə vuruşan Aşurəli Zərbəliyev oktyabrın 11-də Füzuli rayonu istiqamətində döyüş tapşırığının yerinə yetirilməsi zamanı şəhid olub.
O, ölümündən sonra "Vətən uğrunda", "Füzulinin azad olunmasına görə" və "Cəsur döyüşçü" medalları ilə təltif edilib.
Kənan Vahid oğlu Ağayev 2002-ci il sentyabrın 9-da Oğuz rayonunun Xalxal kəndində anadan olub. Oğuz rayonunun İntizam Rəhimov adına Qumlaq kənd orta məktəbində orta təhsil alıb. Təhsilini başa vurduqdan sonra Azərbaycan Silahlı Qüvvələrinin sıralarında hərbi xidmət keçib.
Azərbaycan Silahlı Qüvvələrinin əsgəri Kənan Ağayev 2023-cü il sentyabrın 19-20-də Azərbaycan Ordusu tərəfindən həyata keçirilən lokal xarakterli antiterror tədbirləri zamanı Xocalı rayonunda şəhid olub.
Kənan Ağayev ölümündən sonra III dərəcəli "Vətənə xidmətə görə" ordeni ilə təltif edilib.
İzzət Müşviq oğlu Hümmətov 1996-cı il sentyabrın 9-da Şabran rayonunun Uzunboyad kəndində anadan olub.
2014-cü ildə həqiqi hərbi xidmətə çağırılıb, 2016-cı ildə Aprel döyüşlərində iştirak edib. 2019-cu ildə yenidən müddətdən artıq həqiqi hərbi xidmətə qəbul olunub.
Azərbaycan Ordusunun əsgəri İzzət Hümmətov 2020-ci il sentyabrın 27-də başlayan Vətən müharibəsi zamanı Cəbrayıl və Füzuli istiqamətlərində gedən döyüşlərdə iştirak edib. O, oktyabrın 12-də Füzuli istiqamətində gedən döyüşlərdə şəhid olub.
İzzət Hümmətov ölümündən sonra III dərəcəli "Vətənə xidmətə görə" ordeni, "Vətən uğrunda", "Cəsur döyüşçü" və "Füzulinin azad olunmasına görə" medalları ilə təltif edilib.
