22 iyul Azərbaycan Milli Mətbuatının 151 illiyidir.
Vaxtilə redaksiyalarda çalışan, qəzet və televiziya jurnalistikasında fəaliyyət göstərən bir sıra eks-jurnalistlərin yolu Milli Məclisdən keçib. Onlar qanunverici orqanda deputat kimi təmsil olunublar. Onların sırasında Milli Məclisin deputatları Sevil Mikayılova və Elçin Mirzəbəyli də var.
58 saylı Xaçmaz kənd seçki dairəsinin deputatı Sevil Mikayılova
Azərbaycan Dövlət Dillər Universitetinin İngilis dili fakültəsini bitirib. 1992–1996-cı illərdə Sumqayıt şəhəri Uşaq və Yeniyetmələrin Yaradıcılıq Mərkəzində, 1996–1999-cu illərdə isə Bakı Elmi-Tədris Mərkəzinin İnformatika və İdarəetmə İnstitutunda ingilis dili müəllimi işləyib.
1996–1998-ci illərdə Azərbaycan Dövlət Teleradio Verilişləri Şirkətində redaktor, 1999–2001-ci illərdə "Midiya Press" İnformasiya Agentliyində, 2001–2004-cü illərdə isə "525-ci qəzet"də tərcüməçi vəzifəsində çalışıb.
2004–2012-ci illərdə "Trend" İnformasiya Agentliyində tərcüməçi, Tərcümə Mərkəzinin direktoru və Tərcümə Departamentinin direktoru, 2012–2017-ci illərdə "Azernews" qəzetinin baş redaktoru olub. 2017-ci ildən hazıradək "Trend" İnformasiya Agentliyinin baş direktorunun müavini vəzifəsində çalışır. Əməkdar jurnalistdir. Milli Məclisin VI və VII çağırışlarının deputatı seçilib.
90 saylı Ağsu seçki dairəsinin deputatı Elçin Mirzəbəyli
1990-cı ildə M.Əliyev adına Azərbaycan Dövlət İncəsənət İnstitutunu, 1992-ci ildə isə Sankt-Peterburq Dövlət Teatr, Musiqi və Kinematoqrafiya İnstitutunu bitirib.
"Sevil" kinoteatrının direktoru, "Sara" TV-nin Xəbər Departamentinin direktor müavini və redaktoru, "Üç nöqtə" qəzetinin redaktoru olub.
2015–2017-ci illərdə "Lider" televiziyasında "Geosiyasət" proqramının müəllifi və aparıcısı, 2017–2019-cu illərdə isə "Xəzər" televiziyasında gündəlik "Xəzər Aktual" proqramının aparıcısı olub.
2006–2024-cü illərdə "Xalq Cəbhəsi" qəzetinin və eyniadlı saytın, 2010–2018-ci illərdə isə Azərbaycan və italyan dillərində nəşr olunan "Via della Seta" ("İpək yolu") jurnalının baş redaktoru olub. Azərbaycan Mətbuat Şurasının İdarə Heyətinin və Azərbaycan Yazıçılar Birliyinin İdarə Heyətinin üzvüdür.
2024-cü ildə Milli Məclisin VII çağırış deputatı seçilib. Əməkdar jurnalistdir.
Mənbə: Modernaz
