Şabran şəhərinin Niyazi küçəsində uzun illərdir davam edən elektrik dirəyi problemi nəhayət həllini tapdı. Küçə sakinlərinin öz gücləri ilə – kustar üsullarla – çəkdikləri elektrik xətləri illərdir ciddi təhlükə mənbəyinə çevrilmişdi. Kabellər evlərin damlarından, ağac budaqlarından və həyətlərin küncündən asılmış vəziyyətdə idi. Bu isə həm yanğın, həm də ölümcül qəza riski yaradırdı.
Sakinlər dəfələrlə aidiyyəti qurumlara – Şabran Rayon İcra Hakimiyyətinə və "Azərişıq" ASC-yə müraciət etsələr də, illərlə bu şikayətlər cavabsız qalmış, “gələn il baxılacaq” vədləri ilə ötüşdürülmüşdü.
Məsələ yalnız Shimal.News tərəfindən ictimailəşdirildikdən sonra diqqət mərkəzinə gəldi. Problemin gündəmə gətirilməsindən qısa müddət sonra əraziyə müvafiq qurumların əməkdaşları cəlb olundu və elektrik xətlərinin təhlükəsiz formada quraşdırılması işlərinə başlanıldı. Yeni dirəklərin quraşdırılması ilə Niyazi küçəsində həm təhlükəsizlik təmin olundu, həm də sakinlərin illərlə davam edən narahatlığı aradan qalxdı.
Sakinlər Shimal.News vasitəsilə səslərinin eşidilməsindən və problemin həllindən məmnun olduqlarını bildiriblər. Onlar bu cür ictimai nəzarətin vacibliyini vurğulayaraq, digər oxşar problemlərin də zamanında həll olunacağına ümid etdiklərini deyiblər.
