Bu gün Vətən müharibəsi şəhidi Qurban Hacıyevin doğum günüdür.
Qurban Hacıyev 18 aprel 1997-ci ildə Balakən rayonunun Mahamalar kəndində anadan olub. 2003–2014-cü illərdə N.Nərimanov adına Mahamalar kənd tam orta məktəbində təhsil alıb. 2015-ci ildə müddətli həqiqi hərbi xidmətə çağırılıb və 2015–2016-cı illərdə Azərbaycan Silahlı Qüvvələrinin hərbi hissələrindən birində xidmət edib.
Azərbaycan Ordusunun əsgəri olan Qurban Hacıyev 2020-ci il sentyabrın 27-də başlanan Vətən müharibəsi zamanı Suqovuşan istiqamətində gedən döyüşlərdə könüllü olaraq iştirak edib. O, sentyabrın 30-da Suqovuşan uğrunda gedən döyüşlər zamanı şəhid olub.
Şəhid Balakən Şəhidlər Xiyabanında torpağa tapşırılıb.
Qurban Hacıyev göstərdiyi şücaətə görə ölümündən sonra Azərbaycan Prezidenti İlham Əliyev-in sərəncamları ilə "Vətən uğrunda", "Suqovuşanın azad olunmasına görə" və "Cəsur döyüşçü" medalları ilə təltif edilib.
Onun əziz xatirəsi doğum günündə ehtiramla yad olunur.
