Zaqatala rayonunun Bəhmətli kəndindən olan Vətən müharibəsi şəhidi, kapitan Fəzail Əliyevin atası Nəzir Əliyev uzun sürən xəstəlikdən sonra 64 yaşında vəfat edib.
Bizim.Media-nın məlumatına görə, şəhid atası Bakı şəhərində müalicə aldığı xəstəxanada dünyasını dəyişib. Onun qan xərçəngi xəstəliyindən əziyyət çəkdiyi bildirilir.
Qeyd edək ki, şəhid kapitan Fəzail Əliyev 1990-cı il noyabrın 5-də Zaqatala rayonunun Bəhmətli kəndində anadan olub. O, 1996–2004-cü illərdə Ə. Cavadov adına Bəhmətli kənd tam orta məktəbində, 2004–2007-ci illərdə isə Cəmşid Naxçıvanski adına Hərbi Liseydə təhsil alıb. 2007–2011-ci illərdə Heydər Əliyev adına Azərbaycan Ali Hərbi Məktəbində ali hərbi təhsil alıb.
Azərbaycan Ordusunun kapitanı olan Fəzail Əliyev 2020-ci il sentyabrın 27-də başlanan Vətən müharibəsi zamanı Füzulinin azadlığı uğrunda gedən döyüşlərdə iştirak edib.
Fəzail Əliyev sentyabrın 30-da Füzuli istiqamətində gedən döyüşlər zamanı şəhid olub və Zaqatala rayonunun Bəhmətli kəndində dəfn edilib.
Prezident İlham Əliyevin sərəncamına əsasən, kapitan Fəzail Əliyev ölümündən sonra "Vətən uğrunda", "Füzulinin azad olunmasına görə" və "İgidliyə görə" medalları ilə təltif olunub.
Şəhidin atası bu gün Bəhmətli kənd qəbiristanlığında torpağa tapşırılıb.
