Bu gün Vətən müharibəsi şəhidi Fətulla Siracovun doğum günüdür.
Fətulla Siracov 18 aprel 2001-ci ildə Şabran rayonunun Gəndov kəndində anadan olub. Ailədə 3 bacı və bir qardaşla böyüyən Fətulla orta təhsilini başa vurduqdan sonra həqiqi hərbi xidmətə yollanıb. O, xidmətini Murovdağ istiqamətində yerləşən hərbi hissədə keçirib.
Azərbaycan Ordusunun əsgəri olan Fətulla Siracov 2020-ci il sentyabrın 27-də başlanan Vətən müharibəsində iştirak edib. O, Murovdağ istiqamətində gedən döyüşlərdə vuruşaraq igidlik göstərib.
Kəlbəcər rayonunun azad olunması uğrunda gedən döyüş əməliyyatlarında göstərdiyi şücaətə görə Azərbaycan Prezidenti İlham Əliyevin sərəncamı ilə "Kəlbəcərin azad olunmasına görə" medalı ilə təltif olunub.
Müharibədən sonra xidmətini davam etdirən Fətulla Siracov 30 yanvar 2021-ci ildə Kəlbəcərdə xidmət zamanı vəfat edib. Şəhid doğulduğu Şabran rayonunun Gəndov kəndində dəfn olunub.
Onun əziz xatirəsi doğum günündə ehtiramla anılır.
