Canını bu torpaq üçün fəda edən insanın adını daşıyan küçə palçıq içində boğulursa bu sağ olanları utandırmalıdır.
Əlacsız qalan Şabran rayon sakinləri Shimal.News-a müraciət edərək bildiriblər ki, Vətən müharibəsi şəhidi Mehdi Hüseynovun adını daşıyan küçədə biabırçı mənzərə yaranıb.
Onların sözlərinə görə, illərdir rayonun bəzi küçələri baxımsız, dağıdılmış və keçilməz haldadır. Lakin şəhid adı daşıyan bir yolun bu gündə qalması sadəcə məsuliyyətsizlik deyil. Bu, qəhrəmanların xatirəsinə açıq-aşkar hörmətsizlikdir. Məsələ ilə bağlı dəfələrlə Şabran Rayon İcra Hakimiyyətinə müraciət edilib, lakin cavab eynidir: sükut. Nə təmir var, nə izahat, nə də məsuliyyət.
Bu yolun indiki vəziyyətdə qalması təkcə infrastruktur problemi deyil. Bu, mənəvi iflasın göstəricisidir. Ümid edək ki, aidiyyəti qurumlar bu utancı görəcək və gec də olsa, məsuliyyət hissi oyanacaq.
