Bu gün şəhidlərimiz Yasər Bəkirov, Yalçın Cavadov və Ziyad Zərbaliyevin doğum günüdür.
Ziyad Nəriman oğlu Zərbaliyev 2002-ci il mayın 19-da Şamaxı şəhərində anadan olub. O, 2008-2017-ci illərdə S.M. Qənizadə adına 1 saylı Şamaxı şəhər tam orta məktəbində, 2017-2019-cu illərdə isə Şamaxı Dövlət Regional Kollecində təhsil alıb. Subay idi.
Ziyad Zərbaliyev 2020-ci ildə müddətli həqiqi hərbi xidmətə çağırılıb. O, sentyabrın 27-də başlayan Vətən müharibəsi zamanı Füzulinin azadlığı uğrunda gedən döyüşlərdə iştirak edib. Oktyabrın 20-də Füzuli istiqamətində gedən döyüşlər zamanı şəhid olub.
Ziyad Zərbaliyev ölümündən sonra "Vətən uğrunda", "Füzulinin azad olunmasına görə" medalları və "Vətənə xidmətə görə" ordeni ilə təltif edilib.
Yalçın Aydın oğlu Cavadov 1985-ci il mayın 19-da Şamaxı rayonunun Sabir qəsəbəsində anadan olub. O, 1992-2002-ci illərdə A. Alxanov adına Sabir qəsəbə tam orta məktəbində təhsil alıb. Ailəli idi. Bir qızı və iki oğlu yadigar qalıb.
Yalçın Cavadov 2003-2005-ci illərdə Dövlət Sərhəd Xidmətinin Naxçıvan şəhərində yerləşən "N" saylı hərbi hissəsində müddətli həqiqi hərbi xidmətdə olub. 2017-ci ildən isə müddətdən artıq həqiqi hərbi xidmət qulluqçusu kimi xidmət edib.
O, 2020-ci il sentyabrın 27-də başlayan Vətən müharibəsi zamanı Füzulinin azadlığı uğrunda gedən döyüşlərdə iştirak edib. Oktyabrın 9-da Füzuli döyüşləri zamanı şəhid olub. Şamaxı Şəhidlər xiyabanında dəfn edilib.
Yalçın Cavadov ölümündən sonra "Vətən uğrunda", "Füzulinin azad olunmasına görə", "Cəsur döyüşçü" medalları və III dərəcəli "Vətənə xidmətə görə" ordeni ilə təltif edilib.
Yasər Əfqan oğlu Bəkirov 2002-ci il mayın 19-da Şamaxı rayonunun Quşçu kəndində anadan olub. O, 2008-2019-cu illərdə F. Əzməmmədov adına Quşçu kənd tam orta məktəbində təhsil alıb. Subay idi.
Yasər Bəkirov 2020-ci ildə müddətli həqiqi hərbi xidmətə çağırılıb. Vətən müharibəsinə qədər Azərbaycan Silahlı Qüvvələrinin Goranboy rayonunda yerləşən "N" saylı hərbi hissəsində xidmət edib.
O, 2020-ci il sentyabrın 27-də başlayan Vətən müharibəsində iştirak edib. Yasər Bəkirov oktyabrın 1-də Suqovuşan istiqamətində gedən döyüşlər zamanı şəhid olub. Şamaxı Şəhidlər xiyabanında dəfn edilib.
Yasər Bəkirov ölümündən sonra "Vətən uğrunda", "Cəsur döyüşçü" və "Suqovuşanın azad olunmasına görə" medalları ilə təltif edilib.
