Şamaxıda Azərbaycanın ən böyük gənclər düşərgələrindən biri olan "Yay Fest 2026" festivalına start verilib.
Gənclər Fondunun dəstəyi ilə keçirilən festival IDEA İctimai Birliyi və bir sıra gənclər təşkilatlarının birgə təşkilatçılığı ilə həyata keçirilir. Tədbir 4 sentyabr tarixinədək davam edəcək.
Artıq altıncı dəfə təşkil olunan festival bu il süni intellekt, rəqəmsal transformasiya və innovasiyalar mövzusuna həsr edilib. Proqram çərçivəsində "Rəqəmsal dövlət", "Media və rəqəmsal savadlılıq", "Kreativ AI", "Müasir şəhərlər və texnologiya", "Elm, etika və gələcək", "Mühəndislik və kod", "Startap və sahibkarlıq" və "AI – İdman və sağlamlıq" istiqamətləri üzrə 8 düşərgə fəaliyyət göstərəcək.
Festival müddətində ümumilikdə 2 mindən çox gəncin iştirak etməsi nəzərdə tutulur. İştirakçılar dövlət qurumlarının, özəl sektorun və texnologiya sahəsinin aparıcı mütəxəssisləri ilə görüşlərdə, panel müzakirələrdə, təlimlərdə və master-klaslarda iştirak edəcəklər.
Bununla yanaşı, festival çərçivəsində idman yarışları, intellektual müsabiqələr, komanda oyunları və konsert proqramları da təşkil olunacaq.
Qeyd edək ki, 18–25 yaş aralığında olan ictimai fəal gənclər festivala qeydiyyatdan keçərək seçim mərhələsində iştirak edə bilərlər. Düşərgədə iştirak ödənişsizdir və hər bir iştirakçı yalnız bir düşərgəyə qoşula bilər.
Mənbə: Azərtac
