Şamaxıda 2 Fevral – Azərbaycan Gəncləri Günü münasibətilə Dağlıq Şirvan İqtisadi rayonu üzrə Gənc Tibb İşçilərinin Konfransı keçirilib.
Shimal.News xəbər verir ki, Azərbaycan Səhiyyə İşçiləri Həmkarlar İttifaqı Respublika Komitəsinin təşkilatçılığı və Şamaxı Rayon Mərkəzi Xəstəxanasının təşəbbüsü ilə keçirilən konfransın məqsədi regionlarda çalışan gənc tibb işçilərinin peşəkar inkişafının dəstəklənməsi və onların karyera imkanlarının genişləndirilməsidir.
Tədbirdə Qobustan, Şamaxı, Ağsu və İsmayıllı rayonlarından olan tibb işçiləri iştirak edib. Açılış mərasimində rəsmi şəxslər çıxış edərək səhiyyə sahəsində gənc kadrların rolunu vurğulayıblar.
Konfrans çərçivəsində karyera planlaması, psixoloji rifah, hüquqi məsələlər və region xəstəxanalarının problemləri müzakirə olunub. Tədbirin sonunda gənc tibb işçiləri arasında intellektual yarış keçirilib, qaliblər mükafatlandırılıb.
