Elm və Ali Təhsil üzrə Dövlət Agentliyinin direktorunun əmrinə əsasən Vasif Müslümov Şamaxı Dövlət Regional Kollecinin direktoru vəzifəsinə təyin edilib.
Shimal.News xəbər verir ki, yeni direktor kollektivə təqdim olunarkən Agentliyin rəhbəri Ülkər Səttarova təhsil müəssisəsinin maddi-texniki bazası ilə tanış olub, auditoriyalara baxış keçirib və tədris prosesi ilə maraqlanıb.
Görüşdə infrastrukturun yaxşılaşdırılması, tədrisin keyfiyyətinin artırılması, idarəetmənin təkmilləşdirilməsi və region üzrə ixtisaslı kadr hazırlığının gücləndirilməsi istiqamətində müzakirələr aparılıb.
Bildirilib ki, Vasif Müslümov Bakı Dövlət Universiteti-də tətbiqi riyaziyyat və kibernetika ixtisası üzrə təhsil alıb, fizika-riyaziyyat elmləri namizədi, dosentdir. O, uzun illər Azərbaycan Dillər Universiteti-ndə çalışıb və 30 ildən artıq pedaqoji təcrübəyə malikdir.
Qeyd edək ki, V.Müslümov bu təyinata qədər Şamaxı Dövlət Regional Kollecində direktor müavini və direktor vəzifəsini müvəqqəti icra edən şəxs olub.
