Şabran rayonundan olan Vətən müharibəsi şəhidi Seyfəddin Balağayevin xatirəsi ehtiramla yad edilir.
Shimal.News məlumat verir ki, Seyfəddin Balağayev 6 mart 1998-ci ildə Şabran şəhərində anadan olub. O, 2004–2015-ci illərdə Şabran şəhərində orta təhsil alıb. Daha sonra 2015-ci ildə Sumqayıt Dövlət Universitetinin Fizika və elektroenergetika fakültəsinə qəbul olunub.
2020-ci ilin sentyabr ayının sonlarında Azərbaycan Silahlı Qüvvələrinin sıralarına qoşulan Seyfəddin Balağayev həmin il sentyabrın 27-də başlayan İkinci Qarabağ müharibəsi zamanı döyüşlərə qatılıb. O, xüsusilə Füzuli rayonunun azadlığı uğrunda gedən ağır döyüşlərdə iştirak edib.
Seyfəddin Balağayev 2020-ci il oktyabrın 7-də, cəmi 22 yaşında Füzuli istiqamətində gedən döyüşlər zamanı qəhrəmancasına şəhid olub. Şəhid oktyabrın 8-də doğulduğu Şabran şəhərində yerləşən Şəhidlər Xiyabanında torpağa tapşırılıb.
