Şabran şəhərinin Heydər Əliyev prospektində yerləşən "Qurtuluş" parkında işıqlandırmanın ləğv olunması əhalinin narazılığına səbəb olub.
Shimal.News-a müraciət edən sakinlərin sözlərinə görə, parkdakı köhnə işıq dirəkləri sökülərək başqa ərazilərdə quraşdırılıb. Onlara yeni işıqlandırma sisteminin qurulacağı bildirilsə də, uzun müddətdir bu istiqamətdə heç bir iş görülməyib.
Sakinlər bildirirlər ki, parkda sahibsiz itlər də dolaşır. Qaranlıq səbəbindən heyvanlar görünməsə də, səsləri ətrafda yaşayan insanlarda narahatlıq yaradır.
Parkda uşaqlar üçün stadion olsa da, axşam saatlarında ərazi tam qaranlıq olduğundan ondan istifadə etmək mümkün deyil.
Vətəndaşlar aidiyyəti qurumlardan parkın işıqlandırılmasını təmin etməyi və insanların, xüsusilə uşaqların təhlükəsiz şəkildə istirahət etməsi üçün şərait yaradılmasını xahiş edirlər.
