Şabran şəhərinin M.Ə.Rəsulzadə küçəsində yaşayan sakinlər aylardır davam edən içməli su problemi ilə üz-üzədir.
Sakinlərin Shimal.News-a verdiyi məlumata görə, bu əraziyə verilən su nəinki fasiləli şəkildə təmin olunur, hətta bəzi günlər ümumiyyətlə su olmur.
Şikayətçilərin bildirdiyinə görə, onları 24 saat fasiləsiz içməli su ilə təmin etməli olan Şabran Su Meliorasiya Sistemlərinin İstismarı İdarəsi öhdəliyini yerinə yetirmir. Suyun verilməsi yalnız səhər və axşam saatlarında bir neçə saatla məhdudlaşdırılıb. Bu isə həm məişət işlərini, həm də gündəlik gigiyena tələbatını ciddi şəkildə çətinləşdirir.
“Uşaqları məktəbə çirkli geyimlə yola salırıq, bəzən günlərlə qab-qacaq yumaq üçün su tapılmır. İllərdir bu küçədə yaşayırıq, amma son aylarda vəziyyət dözülməz hal alıb. Bəzən idarədən “nasoslar köhnədir”, “təmir gedir” kimi ümumi və qeyri-dəqiq cavablarla vəziyyət ört-basdır edilir”, – deyə sakinlərdən biri bildirib.
Ərazidə yaşayanlar məsələ ilə bağlı aidiyyəti qurumlara dəfələrlə müraciət etdiklərini, lakin problemi aradan qaldıracaq konkret addımların atılmadığını vurğulayıblar.
