Şabran rayonunun Sumağava Qazma kəndində sel suları insanların həyatına təhlükəli vəziyyət yaradıb.
Shimal.News-a müraciət edən sakinlər bildiriblər ki, sel hər il torpaq qatını yuyur. Son hadisədən sonra isə çayın məcrası genişlənərək yaşayış evlərinə daha da yaxınlaşıb.
Vətəndaşların son 2 il ərzində dəfələrlə aidiyyəti qurumlara müraciətləri isə həllini tapmır. Onların sözlərinə görə, çayla evlər arasında cəmi bir neçə metr məsafə qalıb:
"Əgər son 3 metr torpaq da yuyulsa, burada faciə baş verə bilər", – deyə kənd sakinləri narahatlıqlarını ifadə ediblər.
Qeyd olunur ki, sel yalnız yaşayış evləri üçün təhlükə deyil, kəndin gündəlik həyatına da ciddi təsir göstərib. Xüsusilə məktəblilərin təhsil müəssisələrinə gediş-gəlişi çətinləşib, bəzi yollar keçilməz vəziyyətə düşüb.
Kənd sakinləri çay sahilində möhkəmləndirmə işlərinin aparılmasını və problemin təcili şəkildə aradan qaldırılmasını istəyirlər.
