Şabran rayonunun şəhid Zakir Məmmədov küçəsində içməli su 3 aydır ki, küçəyə axıdılır.
Sakinlər Shimal.News-a bildiriblər ki, bu müddət ərzində nə təmir briqadaları, nə də müvafiq qurumlardan operativ müdaxilə olmayıb. Yalnız yanğın söndürən hidranta ağac materialından hazırlanmış paz vurulub. Su itkisi isə davam edir.
Bu vəziyyət yalnız içməli suyun israfı ilə kifayətlənmir — küçədə palçıq və çirkab yaranıb, yol isə keçilməz hala düşüb. Nəticədə sakinlər gündəlik həyatlarında çətinliklərlə üzləşirlər.
Vətəndaşlar məsələ ilə bağlı aidiyyəti qurumlara dəfələrlə müraciət etsələr də, hələ ki, konstruktiv cavab almayıblar. Onların sözlərinə görə, belə bir haqsızlığın — üstəlik, "şəhid" adını daşıyan küçədə yaşanması — ictimai narazılıq doğurur.
Hazırda sakinlər problemin işıqlandırılmasını, rəsmi qurumların operativ müdaxiləsini və məsul şəxslərin məsuliyyətə cəlb olunmasını tələb edirlər.
