Bu gün şəhid Şair Heydərovun doğum günüdür.
Şair Camaloviç oğlu Heydərov 4 sentyabr 1998-ci ildə Qusar rayonunun Mucuq kəndində anadan olub. Ailəli idi, 1 qız övladı var.
Şair Heydərov Səfərbərlik və Hərbi Xidmətə Çağırış üzrə Dövlət Xidmətinin Qusar rayon şöbəsi tərəfindən hərbi xidmətə çağırılıb. O, bir müddət Azərbaycan Silahlı Qüvvələrinin sıralarında, "N" saylı hərbi hissələrdən birində hərbi xidmət keçib. Hərbi xidmət müddəti başa çatdıqdan sonra bir müddət mülki fəaliyyətlə məşğul olub. Daha sonra müddətdən artıq həqiqi hərbi xidmət qulluqçusu kimi yenidən hərbi xidmətə başlayıb.
Şair Heydərov 23 mart 2022-ci ildən 31 may 2022-ci ilədək "Komando" Dağ Təlim Mərkəzində keçirilən 5-ci qəbul "Komando başlanğıc kursu"nu uğurla başa vurub və "Komando başlanğıc döş nişanı"na layiq görülüb. Bundan sonra Quru Qoşunlarının tərkibindəki Komando briqadasında kəşfiyyatçı kimi xidmətini davam etdirib.
2022-ci il sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Təxribat nəticəsində Azərbaycan-Ermənistan sərhədində döyüş toqquşmaları baş verib.
Şair Heydərov həmin döyüşlərdə Quru Qoşunlarının Komando briqadasının hərbçisi, kəşfiyyatçı və snayper kimi iştirak edib. O, 13 sentyabr 2022-ci ildə döyüş tapşırığının yerinə yetirilməsi zamanı şəhid olub.
Şair Heydərovun nəşi sentyabrın 16-da doğulduğu Qusar rayonunun Mucuq kəndində torpağa tapşırılıb.
O, ölümündən sonra 3-cü dərəcəli "Rəşadət" ordeni və "Vətən uğrunda" medalı ilə təltif edilib.
