Qusar rayonunda su və meliorasiya infrastrukturunun inkişafı, həmçinin güclü leysan yağışlarının yaratdığı fəsadların aradan qaldırılması istiqamətində görülən və planlaşdırılan işlərə yerində baxış keçirilib.
Shimal.News xəbər verir ki, icra başçısı Sahir Məmmədxanovun dəvəti ilə Azərbaycan Dövlət Su Ehtiyatları Agentliyinin və tabeli qurumların nümayəndələri baxışda iştirak ediblər.
Səfər zamanı mart-aprel aylarında yağan intensiv yağışların zərər vurduğu ərazilər nəzərdən keçirilib, mövcud vəziyyət, görülən bərpa tədbirləri və qarşıda duran işlər müzakirə olunub.
Samur çayının Yuxarı Zeyxur kəndi ərazisində sel sularının sahil torpaqlarını yuması və digər fəsadlar qiymətləndirilib. Həmçinin zərər görmüş kənd təsərrüfatı sahələri və fermer təsərrüfatlarının vəziyyəti müzakirə edilib.
Daha sonra Yuxarı Qələnxur kəndində dağılmış və bərpası mümkün olmayan suvarma arxının əvəzinə su təminatının yaradılması üçün nəzərdə tutulan nasosxananın tikinti ərazisinə baxılıb. Layihənin həyata keçirilməsi imkanları və görüləcək işlər nəzərdən keçirilib.
Zuxul kəndində intensiv yağıntılar səbəbindən dağılmış kanalın bərpası, Hil kəndində isə çay sahilində sahilbərkitmə işlərinin aparılması və mühafizə bəndlərinin inşası ilə bağlı layihələr müzakirə olunub.
Səfərin sonunda Avaran kəndində həyata keçirilən içməli su layihəsi ilə tanışlıq olub.
