Qusar rayonunda kənd təsərrüfatının inkişafı ilə bağlı qarşıda duran vəzifələr müzakirə olunub.
Shimal.News xəbər verir ki, icra başçısı Sahir Məmmədxanovun sədrliyi ilə keçirilən iclasda "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı"ndan irəli gələn məsələlər əsas müzakirə mövzusu olub.
Eyni zamanda, iyunun 16-da Quba şəhərində keçirilmiş regional müşavirədə səsləndirilən tapşırıqlar və onların Qusar rayonunda icrası ilə bağlı görüləcək işlər də nəzərdən keçirilib.
İclasda kənd təsərrüfatında məhsuldarlığın artırılması, su və torpaq ehtiyatlarından səmərəli istifadə, müasir suvarma sistemlərinin tətbiqi, məhsulların emalı və logistika imkanlarının genişləndirilməsi, fermerlərə dövlət dəstəyinin gücləndirilməsi və ərzaq təhlükəsizliyinin təmin olunması istiqamətində fikir mübadiləsi aparılıb.
Bundan əlavə, Qusarın kənd təsərrüfatı potensialından daha səmərəli istifadə, heyvandarlığın inkişafı, örüş və otlaq sahələrinin idarə olunması, eləcə də su təminatının yaxşılaşdırılması ilə bağlı qarşıda duran vəzifələr müəyyənləşdirilib.
İcra başçısı Sahir Məmmədxanov aidiyyəti qurum rəhbərlərinə Dövlət Proqramında nəzərdə tutulan tədbirlərin rayonda operativ və əlaqələndirilmiş şəkildə icrasını təmin etməyi, fermerlərin müraciətlərinə həssas yanaşmağı və aqrar sahənin inkişafına xidmət edən layihələrin vaxtında reallaşdırılmasını tapşırıb.
