Qusar rayonunda əlilliyi olan və çətin həyat şəraitində yaşayan uşaqların sosial müdafiəsinin gücləndirilməsi istiqamətində yeni layihələrin icrasına başlanılıb.
Shimal.News xəbər verir ki, Əmək və Əhalinin Sosial Müdafiəsi Nazirliyi yanında Sosial Xidmətlər Agentliyinin sosial sifarişi əsasında "Sosial-İqtisadi və Ekoloji İnkişaf" İctimai Birliyi tərəfindən həyata keçirilən layihələr 2026-cı il iyunun 1-dən dekabrın 31-dək davam edəcək.
Layihələrdən biri olan "Əlilliyi olan uşaqlar üçün sosial reabilitasiya mərkəzlərinin fəaliyyətinin təşkili" çərçivəsində Qusarda yaradılan Sosial Reabilitasiya Mərkəzində ümumilikdə 50 uşağa xidmət göstərilməsi nəzərdə tutulur. Hazırda mərkəzdə 24 əlilliyi təsdiq olunmuş uşaq gündəlik reabilitasiya və sosial xidmətlərdən yararlanır, yeni müraciətlərin qəbulu isə davam edir.
Mərkəzdə uşaqlara psixoloji dəstək göstərilir, müxtəlif inkişaf dərnəkləri təşkil olunur, onların özünəxidmət bacarıqlarının artırılması, bilik və bacarıqlarının inkişafı, cəmiyyətə inteqrasiyası istiqamətində fərdi proqramlar əsasında iş aparılır.
İyulun 15-də Qusar Rayon İcra Hakimiyyəti başçısının müavini Ceyhun Hacıyev Sosial Reabilitasiya Mərkəzində olub, burada yaradılan şəraitlə tanış olub. O, mərkəzin fəaliyyətini yüksək qiymətləndirərək bu cür sosial layihələrin dövlət tərəfindən daim dəstəkləndiyini vurğulayıb.
Səfər çərçivəsində Qusar Rayon İcra Hakimiyyəti tərəfindən mərkəzə müasir əlil arabası hədiyyə olunub. Görüş zamanı valideynlərlə də söhbət aparılıb, onların təklif və müraciətləri dinlənilib. Valideynlər yaradılan şəraitə və göstərilən diqqətə görə təşəkkürlərini bildiriblər.
