Ailə, Qadın və Uşaq Problemləri üzrə Dövlət Komitəsinin "Mənim hüquqlarım" təşviqat avtobusu layihəsi Qusar rayonunda olub.
Shimal.News xəbər verir ki, 2-4 sentyabr tarixlərində keçirilən layihə çərçivəsində Qusar Rayon İcra Hakimiyyətinin dəstəyi ilə Urva, Piral, Yasab, Əniq və Yuxarı Ləgər kəndlərində 138 uşağın iştirakı ilə maarifləndirici təlimlər təşkil olunub.
Uşaqlara "İnternet təhlükəsizliyi", "Uşaq hüquqları" və "Asudə vaxtın səmərəli təşkili" mövzularında məlumat verilib. Təlimlər zamanı interaktiv oyunlar və qrup işləri keçirilib, müxtəlif məsələlər ətrafında fikir mübadiləsi aparılıb.
Görüşlərdə Uşaq Səfirlər Məclisinin fəaliyyəti barədə də məlumat verilib.
Sonda uşaqlara bədii kitablar və stikerlər hədiyyə olunub.
