Prezident İlham Əliyevin sərəncamı ilə Qusar və Şabran əsilli hərbçilərə general-mayor ali hərbi rütbəsi verilib.
General-mayor rütbəsi alan Ruslan Ağasiyev 1976-cı ildə Qusar rayonunda anadan olub. O, 1997-ci ildə Bakı Ali Ümumqoşun Komandirlər Məktəbini bitirib.
Ruslan Ağasiyev 2016-cı ilin Aprel döyüşlərində briqada komandiri kimi iştirak edib, 44 günlük Vətən müharibəsində isə Birinci Ordu Korpusunun qərargah rəisi olaraq döyüşlərdə fərqlənib. O, həmçinin "Qisas" əməliyyatında və 2023-cü ilin sentyabrında Qarabağda keçirilən lokal antiterror tədbirlərində də iştirak edib.
Məlumata görə, Aprel döyüşlərində düşmənin müdafiə xəttinin yarılması və yüksəkliklərin azad edilməsində mühüm rol oynayan Ruslan Ağasiyevin adı sonradan Ağdərə istiqamətindəki postlardan birinə verilib. Hazırda o, İkinci Ordu Korpusunun qərargah rəisi vəzifəsində xidmət edir.
General-mayor ali hərbi rütbəsi verilən digər zabit Gülməmməd Rzayev isə əslən Şabran rayonundandır. O, Vətən müharibəsi zamanı artilleriya briqadasının komandiri kimi xidmət edib.
Hazırda Gülməmməd Rzayev Azərbaycan Quru Qoşunlarında artilleriya rəisi vəzifəsini icra edir.
Mənbə: Olke.az
