Quba rayonunun Qırmızı Qəsəbəsində anadan olan Milix Yevdayevə 1-ci dərəcəli "Vətənə xidmətə görə" ordeni təqdim olunub.
Orden Prezident İlham Əliyevin Sərəncamı ilə ölkənin ictimai həyatında uzunmüddətli səmərəli fəaliyyətinə görə Milix Yevdayevə verilib.
Ordenin təqdimetmə mərasimində Dini Qurumlarla İş üzrə Dövlət Komitəsinin sədri Ramin Məmmədov iştirak edib. O, Azərbaycanda dini tolerantlığın, müxtəlif konfessiyaların nümayəndələrinin dinc və mehriban şəraitdə birgə yaşamasının ölkənin səciyyəvi xüsusiyyətlərindən biri olduğunu bildirib.
Ramin Məmmədov Milix Yevdayevin Azərbaycanda multikultural dəyərlərin qorunması və inkişaf etdirilməsi istiqamətində xidmətlərini də xüsusi qeyd edib. Komitə sədri onun fəaliyyətinin dövlət tərəfindən hər zaman diqqət və yüksək qiymətləndirildiyini vurğulayıb.
Milix Yevdayev göstərilən diqqət və etimada görə Prezident İlham Əliyevə təşəkkür edib. O, ordenlə təltif olunmasını həyatında mühüm, eyni zamanda böyük şərəf və məsuliyyət doğuran hadisə kimi dəyərləndirib.
Yevdayev bundan sonra da Azərbaycanda mədəni müxtəlifliyin qorunması və tolerantlıq siyasətinin təşviqinə töhfə verməyə çalışacağını bildirib.
Mənbə: Azərtac
