Quba rayonunun Elbir (Vladimirovka) kənd sakinləri suvarma suyu ilə bağlı yaranan problemdən şikayətçidirlər.
Shimal.News-a danışan sakinlərin sözlərinə görə, suvarma üçün nəzərdə tutulan su uzun müddətdir küçə ilə axaraq yolu yararsız vəziyyətə salıb. Yol palçıq içində qalır və hərəkət çətinləşir.
Şikayətçilər qeyd edirlər ki, məsələ ilə bağlı aidiyyəti qurumlara dəfələrlə müraciət olunmasına baxmayaraq, problem hələ də həllini tapmayıb.
"Artıq iki ildir ki, bu vəziyyət davam edir. Su yolun içi ilə axır, küçəmiz az qala çaya çevrilib. Hamının xəbəri var, amma problem olduğu kimi qalır", - deyə sakinlər bildiriblər.
Kənd sakinləri aidiyyəti qurumlardan problemin aradan qaldırılması və yolun bərpası üçün tədbir görülməsini tələb edirlər.
