Quba rayonunun Çinarlı kəndində məktəbin qarşısındakı yolun bəzi hissələrində çuxurlar asfaltla təmir edilsə də, dağılan digər sahələrə müdaxilə olunmayıb. Məsələ ilə bağlı qəribə izahat verilib.
Shimal.News xəbər verir ki, sakinlərin çoxsaylı şikayətlərindən sonra bu gün ərazidə müəyyən çuxurlara asfalt yamağı vurulub. Lakin məktəbin qarşısında dağılan hissələrin təmir edilmədiyi bildirilir.
Vətəndaşların sözlərinə görə, həmin hissə məktəbin ərazisi olduğu əsas gətirilərək təmir aparılmayıb. Onlar isə yolun bu vəziyyətə məktəb şagirdlərinin fəaliyyəti nəticəsində düşmədiyini bildirirlər.
Qeyd olunur ki, məktəbin qarşısında quraşdırılan tramplinlər səbəbindən bəzi avtomobillər, o cümlədən yük maşınları onların üzərindən keçməmək üçün məktəbin qarşısındakı hissədən hərəkət edib. Sakinlər bunun nəticəsində yol örtüyünün ciddi şəkildə dağıldığını deyirlər.
Onlar aidiyyəti qurumların ərazidə yaranmış problemin tam aradan qaldırılması üçün tədbir görməsini istəyirlər.
