Quba rayonunun Çinarlı kəndində, Quba-Xaçmaz yolu ilə məktəb yolunun kəsişməsində yeni quraşdırılan işıqforun yaxınlığında təsərrüfat kanalının üzərinin açıq qalması sürücülər üçün təhlükə yaradır.
Shimal.News-a müraciət edən sakinlərin sözlərinə görə, məktəb yolundan çıxaraq sağa dönən avtomobillərin kanala düşməsi halları dəfələrlə təkrarlanıb. Onlar bildirirlər ki, belə hadisələr zamanı avtomobillər zədələnir və nəqliyyat vasitələrinin kanaldan çıxarılması üçün evakuator çağırılır.
Sakinlərin sözlərinə görə, xüsusilə qış aylarında, dumanlı və zəif görünüş şəraitində həmin hissədə qəza riski artır.
Onlar qeyd edirlər ki, əvvəllər kanalın üzərində beton plitələr olub, yük avtomobillərinin ağırlığı nəticəsində plitələr qırılıb və kanalın üstü açıq qalıb.
Ərazidəki digər problem isə yolun yaxınlığında yerləşən işıqlandırma dirəyidir. Sakinlərin sözlərinə görə, dirək bir ildən çoxdur ki, əyilmiş vəziyyətdədir və aşmaq təhlükəsi yaradır. Onlar dirəyin aşaraq avtomobillərə zərər vuracağından narahatdırlar.
Sakinlər aidiyyəti qurumlardan kanalın üzərinin təhlükəsiz şəkildə bağlanmasını, eləcə də əyilmiş işıqlandırma dirəyinin vəziyyətinin yoxlanılaraq tədbir görülməsini tələb edirlər.
