Quba şəhərində Sədərək bazarı yaxınlığında yerləşən məhəllədaxili yol acınacaqlı vəziyyətdədir.
Bu barədə Shimal.News-a danışan sakinlərin sözlərinə görə, həmin küçədə yol demək olar ki, tam yararsız hala düşüb. Yağışlı havalarda yol palçıq və iri gölməçələrlə dolur, bu da sakinlərin hərəkətini çətinləşdirir.
"Vəziyyət o həddə çatıb ki, evdən çıxarkən ayaqlarımıza sellofan paket bağlamağa məcbur qalırıq ki, asfalt yola çatana qədər palçığa batmayaq.
Dəfələrlə aidiyyəti qurumlara müraciət etmişik. Lakin indiyədək heç bir tədbir görülməyib", - deyə sakinlər qeyd ediblər.
Onlar məhəllədaxili yolun təmir olunması və problemin aradan qaldırılması üçün aidiyyəti qurumlardan tədbir görülməsini tələb edirlər.
