Quba rayonunda Qırmızı Qəsəbə istiqamətindəki piyada səkisində təhlükəli vəziyyət yaranıb.
Shimal.News-a danışan sakinlər bildirirlər ki, səkidə elektrik naqilləri açıq vəziyyətdə qalıb. Yol kənarında, piyadaların hərəkət etdiyi hissədə naqillərin qoruyucu örtüksüz və nəzarətsiz şəkildə açıq qalması ciddi təhlükə yaradır.
Xüsusilə uşaqlar və yaşlılar üçün risk yaradan bu vəziyyət hər an bədbəxt hadisəyə səbəb ola bilər. Sakinlər aidiyyəti qurumları məsələ ilə bağlı təcili tədbir görməyə çağırırlar.
