Quba "PeşəFest-2026"a ev sahibliyi edib. Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin təşkil etdiyi festival "Peşə öyrən, gələcəyini qur!" devizi ilə keçirilib.
Shimal.News xəbər verir ki, tədbirin əsas məqsədi şagird, tələbə və onların valideynlərini əmək bazarında aktual olan peşələrlə tanış etmək, gənclərin düzgün peşə və karyera seçiminə dəstək göstərmək olub.
Festivalda Quba Rayon İcra Hakimiyyətinin başçısı İlqar Mahmudov, deputatlar Əlibala Məhərrəmzadə və Müşfiq Məmmədli, Dövlət Məşğulluq Agentliyinin İdarə Heyətinin sədri Hasil Abbasov, dövlət və özəl qurumların nümayəndələri, eləcə də ictimaiyyət nümayəndələri iştirak ediblər.
İlqar Mahmudov "PeşəFest"in gənclərin peşə seçimlərinə dəstək verilməsi və onların əmək bazarına inteqrasiyası baxımından əhəmiyyətli olduğunu bildirib. Onun sözlərinə görə, bu cür təşəbbüslər gənclərin potensialının üzə çıxarılmasına və regionda məşğulluq imkanlarının genişləndirilməsinə kömək edir.
Hasil Abbasov isə əmək bazarında baş verən dəyişikliklər fonunda gənclərin müasir peşələr üzrə bacarıqlarının inkişaf etdirilməsinin vacibliyini vurğulayıb. O qeyd edib ki, festival iştirakçılara peşələr barədə praktiki məlumat əldə etmək və gələcək karyeraları ilə bağlı daha düzgün seçim etmək imkanı yaradır.
Tədbirdə peşəkarlar müxtəlif təqdimatlarla çıxış edərək öz ixtisaslarının xüsusiyyətləri barədə məlumat verib, iştirakçıların suallarını cavablandırıb və peşə seçimi ilə bağlı tövsiyələrini bölüşüblər.
Qeyd edək ki, "PeşəFest-2026" layihəsinin növbəti tədbiri 25 sentyabrda Qax şəhərində, Qax Bələdiyyəsinin binası qarşısında keçiriləcək.
