Quba rayonunun II Nügədi kəndində yerləşən futbol meydançasının acınacaqlı vəziyyəti kənd sakinlərinin narazılığına səbəb olub.
Məsələ ilə bağlı Shimal.News-a danışan sakinlərin sözlərinə görə, meydança bələdiyyənin balansındadır və uzun illərdir lazımi qaydada baxılmır. Buna baxmayaraq, kəndin "Nügədi" futbol komandası və gənclər öz imkanları hesabına meydançanı istifadəyə yararlı saxlamağa çalışıblar.
Bildirilir ki, bir neçə ay əvvəl futbolçular və kənd gəncləri şəxsi vəsaitləri hesabına ərazidə abadlıq işləri apararaq meydançanı yaşıllaşdırıblar. Lakin indi buna maddi imkanları çatmır.
Hazırda meydançanın ətrafı hasarlanmadığı üçün əraziyə inəklər daxil olur, tikanlı otlar basıb, uşaqlar isə bəzən meydana daş, şüşə və digər tullantılar atırlar. Bundan əlavə, ərazinin bir hissəsinin başqa məqsədlər üçün istifadə edildiyi də iddia olunur.
Sakinlər bildirirlər ki, kəndin futbol komandası məşqlərini bu meydançada keçirir və aidiyyəti qurumlardan meydançanın yenidən abadlaşdırılması, hasarlanması və daim nəzarətdə saxlanılması üçün tədbir görülməsini xahiş edirlər.
