Quba rayonunun Möhüc kəndində yerləşən, XIX əsrin sonu - XX əsrin əvvəllərinə aid olduğu bildirilən Cümə məscidinin hazırkı vəziyyəti heç də ürəkaçan deyil.
Shimal.News-a müraciət edən kənd sakinlərinin sözlərinə görə, məscid uzun illərdir baxımsız vəziyyətdədir və hazırda tamamilə uçmaq təhlükəsi ilə üz-üzədir.
Onlar bildirirlər ki, kənd camaatı tərəfindən məscidin təmiri üçün dəfələrlə təşəbbüs göstərilib. Təmir məqsədilə tikinti materialları da alınıb, lakin məsciddə işlərin aparılmasına icazə verilməyib.
Sakinlər deyirlər ki, məscidin daha da dağılıb sıradan çıxmaması üçün onun təmirinə və ya bərpasına imkan yaradılmasını istəyirlər.
Qeyd edək ki, məscidin Mədəniyyət Nazirliyinin balansında olduğu da bildirilir. Məsələ ilə bağlı Tüləkəran Bələdiyyəsinin sədri Rauf Hüseynov əvvəllər bildirib ki, bələdiyyə məscidin bərpası üçün addımlar atıb. 2022-ci ildə hazırlanmış bərpa layihəsinin Tarix İnstitutu tərəfindən müsbət rəy aldığı, lakin sonradan layihənin icrasına icazə verilmədiyi açıqlanıb.
Hazırda kənd sakinləri məscidin taleyi ilə bağlı aidiyyəti qurumlardan konkret addım gözləyirlər.
Məsələ ilə bağlı Mədəniyyət Nazirliyinə sorğu ünvanlanıb.
