Qubada müşahidə olunan güclü yağışlar ciddi fəsadlara səbəb olub. Rayonun müxtəlif ərazilərində kanalizasiya sistemlərinin nasazlığı nəticəsində çirkab sular yaşayış məntəqələrinə yayılıb.
Belə hallardan biri Zərdabi qəsəbəsində qeydə alınıb.
Shimal.News-un məlumatına görə, Quba və Qusar rayonlarının çirkab sularının axıdılması üçün nəzərdə tutulan mərkəzi kanalizasiya xəttinin tutulması nəticəsində çirkab suları daşaraq ətrafa yayılıb. Nəticədə çirkab suları təxminən 200 metr məsafədə Quba-Xaçmaz yolu boyunca axaraq 10-a yaxın evin həyətinə dolub.
Oxşar vəziyyət rayonun M.Ə. Rəsulzadə küçəsinin aşağı hissəsində də müşahidə olunur. Sakinlərin sözlərinə görə, ərazidə əvvəl mövcud olan arxların ləğv edilməsi və yeni kanalizasiya sisteminin qurulmasından sonra problem daha da dərinləşib. Güclü yağışlar zamanı yuxarı küçələrdən gələn yağış suları və daşan kanalizasiya xətləri birləşərək həyətlərə dolur. Bu isə ərazidə antisanitar vəziyyətin yaranmasına, kəskin qoxuya və yaşayış şəraitinin çətinləşməsinə səbəb olur.
Sakinlər bildirirlər ki, məsələ ilə bağlı aidiyyəti qurumlara müraciət etsələr də, hələlik problem öz həllini tapmayıb. Hazırda isə küçələrdə çirkab suların axını davam edir.
