Quba rayonunun Zeyid kəndinə gedən yolun vəziyyəti sakinlərin ciddi narazılığına səbəb olub.
Xəzər TV-nin məlumatına görə, kəndə aparan asfalt yolun 17 kilometrlik hissəsi uzun müddətdir yararsız vəziyyətdədir. Yağışlardan sonra yolun böyük hissəsi bataqlığa çevrilib, bəzi yerlərdə isə torpaq sürüşməsi qeydə alınıb. Nəticədə kəndə yalnız yüksək keçidli avtomobillərlə getmək mümkün olur, lakin bu nəqliyyat vasitələri də tez-tez texniki nasazlıqla üzləşir.
Sakinlər bildirirlər ki, yolun bu vəziyyəti gündəlik həyatı tam iflic edib. Ərzaq daşınması, xəstələrin rayon mərkəzinə çatdırılması və ümumi gediş-gəliş ciddi problemlərlə müşayiət olunur. Bəzi hallarda insanlar alternativ yol olmadığı üçün otlaq sahələrindən keçməyə məcbur qalırlar.
Məsələ ilə bağlı 5 saylı Yol İstismarı MMC-nin mühəndisi Rövşən Babayev bildirib ki, əraziyə texnika və canlı qüvvə cəlb olunub, hazırda yolun 7-ci kilometrliyində bərpa işləri aparılır. Onun sözlərinə görə, işlərin gecikməsinə səbəb son aylarda yağan intensiv yağışlardır.
Quba Rayon İcra Hakimiyyətindən isə bildirilib ki, bölgədə yağıntılar nəticəsində yaranan fəsadların aradan qaldırılması istiqamətində işlər davam etdirilir və Zeyid kəndinə gedən yol mərhələli şəkildə bərpa olunacaq.
