Qubanın Çinarlı kəndində, "4 yol" kimi tanınan ərazidə yeni işıqfor quraşdırılıb. Lakin nizamlayıcının tətbiqindən sonra kəsişmədə, xüsusilə pik saatlarda, tıxac problemi yaranıb.
Shimal.News məlunat verir ki, işıqforun əsas məqsədi yol hərəkətini tənzimləmək, nəqliyyat vasitələrinin təhlükəsiz və rahat hərəkətini təmin etməkdir. Lakin sürücülərin sözlərinə görə, Çinarlıda quraşdırılan yeni işıqfor hazırda hərəkəti asanlaşdırmaq əvəzinə əlavə çətinlik yaradır.
Problem xüsusilə Xaçmazdan gələn və sola dönmək istəyən avtomobillərin hərəkəti zamanı özünü göstərir. Növbə yarandıqda, arxadan gələn və düz istiqamətdə hərəkət edən nəqliyyat vasitələri işıqforun növbəti yaşıl siqnalını gözləməli olur.
Sürücülərin bir qismi hesab edir ki, işıqforun saniyələrinin yenidən tənzimlənməsi və sola dönməyə məhdudiyyət qoyulması vəziyyəti yaxşılaşdıra bilər.
Digər sürücülər isə sola dönmənin qadağan edilməsinin düzgün həll olmadığını düşünürlər. Onların təklifinə görə, kəsişmədə təsərrüfat kanalının üzərindən sağ tərəfə əlavə hərəkət zolağı salınaraq yol genişləndirilə bilər.
Bu halda sola dönən avtomobillər növbədə gözlədiyi vaxt düz istiqamətdə hərəkət edən nəqliyyat vasitələri əlavə zolaqla maneəsiz davam edə bilərlər.
Yani ki, kiçik yol genişləndirməsi ilə problemin daha sadə şəkildə həlli mümkündür.
