Quba şəhərində "Şəhərsalma və Memarlıq İli" çərçivəsində, eləcə də Aşıq Ələsgərin anadan olmasının 205 illiyi münasibətilə "Dədə Ələsgər poeziyasında məkan və yaddaş: Göyçə konteksti (Quba müstəvisində)" mövzusunda elmi-praktik tədbir keçirilib.
Shimal.News xəbər verir ki, tədbir Qərbi Azərbaycan İcmasının Quba rayon nümayəndəliyi, Dədə Ələsgər Ocağı İctimai Birliyi və Azərbaycan Dövlət Pedaqoji Universitetinin Quba filialının birgə təşkilatçılığı ilə baş tutub.
Tədbirdən əvvəl iştirakçılar Qərbi Azərbaycanın tarixi, mədəni irsi və Dədə Ələsgərin həyat və yaradıcılığını əks etdirən sərgi ilə tanış olublar.
ADPU-nun Quba filialının Sosial və humanitar məsələlər üzrə direktor müavini Aysel Şeydayevanın moderatorluğu ilə keçirilən tədbir Dövlət Himninin səsləndirilməsi və şəhidlərin xatirəsinin yad olunması ilə başlayıb. Daha sonra Aşıq Ələsgərə həsr olunmuş videoçarx nümayiş etdirilib.
Qərbi Azərbaycan İcmasının Quba rayon nümayəndəliyinin sədri İlham Qaraqurbanlı çıxışında Dədə Ələsgər irsinin Quba müstəvisində araşdırılmasının tarixi yaddaşın qorunması baxımından mühüm əhəmiyyət daşıdığını bildirib.
ADPU-nun Quba filialının direktoru, professor Yusif Alıyev isə məruzəsində Aşıq Ələsgər poeziyasında yer alan Göyçə mahalının toponimlərini, coğrafi məkanlarını və təbiət təsvirlərini tarixi-mədəni kontekstdə təhlil edib. O qeyd edib ki, sənətkarın yaradıcılığında əks olunan coğrafi adlar xalqın həmin torpaqlardakı tarixi varlığının poetik ifadəsidir.
Tədbirdə çıxış edən digər natiqlər də Dədə Ələsgər irsinin milli-mənəvi yaddaşın formalaşmasındakı rolundan danışaraq, bu irsin gələcək nəsillərə çatdırılmasının vacibliyini vurğulayıblar.
