Quba rayonunun Qırmızı qəsəbəsində yaşayan dağ yəhudiləri Roş ha-Şana bayramını qeyd edirlər. Onlar yəhudi təqvimi ilə 5787-ci ili qarşılayırlar.
Shimal.News xəbər verir ki, qəsəbə sakinləri sinaqoqa gələrək dualar oxuyur, dini ayinlərini yerinə yetirirlər.
Dağ Yəhudiləri Dini İcmasının sədri Pisax İsakov Roş ha-Şana bayramının mənasından danışıb. Onun sözlərinə görə, "Roş" "baş" deməkdir və ilin başlanğıcını ifadə edir:
"Bu bayramın adı Roş ha-Şanadır. Roş baş deməkdir. İlin başı. Yəni ilin əvvəli yəhudi təqvimi ilə Tişri ayının birinə təsadüf edir. İlin əvvəlidir və ayın birindən onuna kimi hər bir yəhudi Allaha müraciət eləyib, öz günahlarının bağışlanmasını istəyir. Biz yəhudilər inanırıq ki, Allah tərəfindən bu günlərdə hər bir insanın, hər bir yəhudinin taleyi həll olunur.
Bayram süfrəsi əlbəttə ki, bol olur. Ən əsası süfrədə bal və alma olmalıdır. Bu gecə biz alma dilimini bala batıraraq yeməliyik ki, gələn ilimiz xoş, şirin keçsin. Yom Kipur bayram günlərinin cərgəsinin finalıdır. Yom Kipurda oruc tutulur. Yom Kipurda hər bir insan sinaqoqa gəlir, burada dua edir".
İcma sədri dağ yəhudilərinin dini adət-ənənələrini əsrlərdir qoruyub saxladıqlarını, Azərbaycanda müxtəlif dini icmalar arasında qarşılıqlı hörmətin mövcud olduğunu da vurğulayıb.
"Yəhudilər özlərinin dini adət-ənənələrini əsrlər qoruyub saxlayıblar. Yəhudilər tərəfindən azərbaycanlıların, müsəlmanların dini bayramlarına hörmətlə yanaşılıb. Azərbaycanlılar da bizim dini bayramlarımıza gəliblər, bizi təbrik ediblər. Bir süfrə arxasında əyləşmişik, deyib-gülüb qardaşcasına da ayrılmışıq və bu ənənə bugünkü günə qədər də davam edir".
P.İsakov Roş ha-Şana ilə bağlı ailə ənənələrindən də danışıb. Onun sözlərinə görə, bayram günü ananın şərəfinə iki şam yandırılır, bəzi ailələrdə isə digər ailə üzvləri üçün də şam yandırılması adəti var.
Bayram mərasimləri çərçivəsində ailədə böyük oğlan uşağı üçün xoruz kəsilməsi, qurbanın ailələr arasında bölüşdürülməsi və çörək paylanması kimi ənənələrin də yaşadıldığı bildirilir.
Mövzu ilə bağlı Baku TV-nin videosunu təqdim edirik:
