Quba-Xaçmaz avtomobil yolunun Quba ərazisindən keçən hissəsində çəkilən yeni yol nişanlanması sürücülər arasında narazılığa səbəb olub.
Shimal.News-a müraciət edən yerli sakinlərin sözlərinə görə, bir neçə gün əvvəl yolda 1.1 nişanlanma xətti çəkilib. Sürücülər bildirirlər ki, Xaçmaz ərazisində yolun müəyyən hissələrində ötməyə imkan verən 1.5 qırıq xətti tətbiq olunsa da, Quba istiqamətində bu imkan xeyli məhdudlaşdırılıb.
Sakinlərin sözlərinə görə, Asan Xidmətin qarşısındakı dairədən Barlı qəsəbəsinin sonunadək ötməyə imkan verən 1.5 xəttinə cəmi iki yerdə rast gəlinir. Bunlardan biri Çinarlının sonundan "Qartal" adlanan əraziyə qədər, digəri isə Zərdabi qəsəbəsinin sonunda təxminən 100 metrlik hissədədir.
Sürücülər xüsusilə yolun kənd təsərrüfatı texnikası tərəfindən intensiv istifadə olunması nəzərə alınmadığını bildirirlər. Onların sözlərinə görə, traktor və digər texnikaların arxasında uzun müddət aşağı sürətlə hərəkət etmək məcburiyyətində qalırlar.
"Başa düşürük, təhlükəsizlik baxımından və yaşayış məntəqələrində ötmə məhdudlaşdırıla bilər. Amma eyni yolun Xaçmaz ərazisində yaşayış məntəqələri olduğu halda orada niyə qırıq xətt çəkilib? Quba hissəsində isə niyə bu imkan demək olar ki, yoxdur? Sürücülər məcburiyyətdən qayda pozurlar", – deyə sakinlərdən biri bildirib.
Eyni zamanda sürücünün "qarşıda yavaş hərəkət edən texnika var" əsaslandırması öz-özlüyündə 1.1 xəttini keçməyə hüquqi əsas yaratmır. Yol nişanlanması qüvvədə olduğu müddətdə sürücü onun tələbinə əməl etməlidir.
Digər tərəfdən, eyni yolun müxtəlif hissələrində fərqli nişanlanmanın tətbiqi həmin sahələrin yol şəraiti və təhlükəsizlik göstəriciləri ilə əsaslandırılmalıdır. Buna görə sakinlərin qaldırdığı əsas sual – Quba və Xaçmaz hissələrində nişanlanmanın niyə fərqli tətbiq edildiyi – yolun təşkilinə cavabdeh qurum tərəfindən izah oluna bilər.
Sakinlər isə xüsusilə kənd təsərrüfatı texnikasının intensiv hərəkət etdiyi bu yolda həm təhlükəsizliyin qorunmasını, həm də nəqliyyat axınının lüzumsuz şəkildə yavaşlamamasını təmin edən həllin tapılmasını istəyirlər.
