Quba-Xaçmaz avtomobil yolu yenə sürücülərin müzakirəsinə səbəb olub.
Shimal.News-a danışan sakinlərin sözlərinə görə, bölgənin ən işlək yollarından hesab olunan, Quba və Xaçmaz şəhərlərini birləşdirən 27 kilometrlik yolun vəziyyəti rayonlar üzrə fərqlənir.
Bildirilir ki, yola sonuncu dəfə təxmini 6 il öncə bir qat asfalt örtüyü çəkilib və həmin vaxt ikinci qatın sonradan salınacağı vəd olunub. Bir müddət sonra Quba rayonu ərazisinə düşən Barlı qəsəbəsindən Quba şəhərinədək olan hissəyə ikinci qat asfalt döşənib, yol nişanlanıb və hərəkət üçün əlverişli vəziyyətə gətirilib.
Lakin Xaçmaz rayonu ərazisinə düşən - Hacıəlibəy kəndindən Xaçmaz dairəsinədək olan hissədə ikinci qat asfalt hələ də vurulmayıb. İllər ötüb və yalnız indi həmin hissədə yol nişanlanma xətlərinin çəkilməsinə başlanılıb.
Sakinlər görülən işi müsbət qiymətləndirsələr də, hesab edirlər ki, yolun tam təmiri başa çatdırılmalı və ikinci qat asfalt da çəkilməlidir.
Onların sözlərinə görə, yol gecə saatlarında işıqlandırılmır, dumanlı havalarda isə nişanlanma xətləri sürücülərin təhlükəsizliyi üçün mühüm əhəmiyyət daşıyır. Quba rayonu ərazisində kəndlərdən keçən hissələrdə işıqlandırma dirəklərinin quraşdırıldığı, Xaçmaz rayonu hissəsində isə belə infrastrukturun olmadığı bildirilir.
Sürücülər aidiyyəti qurumlardan yolun Xaçmaz rayonu ərazisinə düşən hissəsinin də tam şəkildə yenilənməsini və təhlükəsizlik tədbirlərinin gücləndirilməsini xahiş edirlər.
