Qubada antisanitar vəziyyət ilə uğursuz mübarizə aparılır.
Bir müddət öncə Alekseyevka kənd sakinləri Shimal.News-a danışaraq bildiriblər ki, Quba-Xaçmaz yolunun kənarında yerləşən zibil qutuları yararsız vəziyyətdədir. Konteynerlərin əksəriyyətinin qapağı yoxdur, bəziləri isə artıq sınıb.
Məsələ ilə bağlı dünən Quba Rayon İcra Hakimiyyəti (RİH) bildirib ki, məişət tullantılarının yığılması və daşınması "Təmiz Quba" MKTB tərəfindən mütəmadi, faisləsiz həyata keçirilir. Alekseyevka kəndi ərazisində yaranmış vəziyyət qısa zamanda aradan qaldırılıb.
Lakin redaksiyamıza daxil olan son görüntülər əksini göstərir. Videodan aydın olur ki, ərazidə vəziyyət faktiki olaraq dəyişməyib və tullantılar ətraf mühitə yayılmaqda davam edir.
Kənd sakinləri qeyd edirlər ki, zibilin yığılması üçün hər ay əhalidən 3 manat ödəniş alınmasına baxmayaraq, mövcud vəziyyət dəyişmir. Qapaqsız konteynerlər səbəbindən sahibsiz itlər tullantıları ətrafa dağıdır və nəticədə ərazi daha da çirklənir.
Vətəndaşlar aidiyyəti qurumlardan problemin aradan qaldırılması və zibil konteynerlərinin yenilənməsini xahiş edirlər.
