Bakı-Quba avtomobil yolunun Qubanın Yeni Güləzi kəndindən keçən hissəsində yerləşən körpü təmir ediləcək. Bu haqda ShimalNews 26 aprel tarixində məlumat verir.
Qusarçay üzərində olan körpü uzun zamandır ki, qəzalı vəziyyətdədir. Sakinlər bildirirlər ki, gün ərzində tikilinin üzərindən minlərlə avtomobil hərəkət edir. Körpünün altında olan panellərdə çatlar günü-gündən daha da böyüyür, betonların arasından armaturlar belə görünür.
AAYDA-nın 5 saylı Yol İstismar İdarəsinin mühəndisi Rövşən Babayev bildirib ki, Bakı-Quba yolunun 181-ci kilometriliyində yerləşən körpü 1972-ci ildə tikilib. Onun təmiri ilə bağlı qərar verilib. Körpünün sol tərəfində alternativ yolun çəkilişinə başlanılıb. Yol sürücülərin istifadəsinə veriləndən sonra körpü təmirə bağlanılacaq.
